Logist – məhsulların hərəkəti üzərində nəzarəti və idarəetməni həyata keçirən, malların və xidmətlərin təchizatçıdan istehlakçıya çatdırılma prosesinin rasional təşkili ilə məşğul olan mütəxəssisdir.

Kommersiya logistikası özündə nəqliyyat, anbar və maliyyə komponentlərini cəmləyən bütöv bir sənayedir. Bu sənayeyə bir neçə peşələr daxildir:

Əməliyyat logisti – hazır məhsulların çatdırılmasını və ya qəbulunu təşkil edir. Maddi və qeyri-maddi axınların və ehtiyatların hərəkəti və yerləşdirilməsinin planlaşdırılması, təşkili, icrası və nəzarəti ilə məşğul olan mütəxəssisdir.

Ekspeditor – müxtəlif yüklər üçün uyğun nəqliyyat axtarır. O, təchizat zəncirinin həyata keçirilməsi ilə məşğuldur. Bütün logistika prosesinə nəzarət edir. 

Dispetçer – daşımaq üçün yük axtarır. Dispetçer, bir qayda olaraq, bir neçə nəqliyyat şirkəti ilə müqavilə bağlayır və o, yükü həm sahibindən, həm də ekspeditordan götürə bilər. Dispetçerlər çox vaxt uzaqdan işləyirlər. 

Beynəlxalq logist – avtomobil, dəmir yolu, dəniz və hava nəqliyyatından istifadə etməklə yüklərin daşınmasını həyata keçirir. 

Satıcı-logist – mağaza və hipermarketlərdə malların dövriyyəsindən cavabdehdir. Rəflərdə yalnız təzə məhsulların olmasını və qiymət etiketlərinin aktual olmasını təmin edir. 

Logistika analitiki – anbarlardakı məhsuların dövriyyəsinə və likvidliyinə nəzarət edir. Satış statistikasını aparır və onun əsasında xammal/komponent tədarükçüləri üçün ərizələr tərtib edir.

Funksiyalar:

• Çatdırılma sisteminin təşkili və təkmilləşdirilməsi;
• Yüklərin çatdırılma prosesində əlavə xərclərin minimuma endirilməsi; 
• Malların çatdırılması, yüklənməsi və boşaldılması, sərnişinlərin daşınması üçün marşrutların qurulması;
• Yükdaşıma ehtiyacı olan müştərilərin axtarışı;
• Daşınma üçün uyğun nəqliyyat axtarışı;
• Optimal marşrutun tərtib edilməsi;
• Monitorinq sistemlərindən istifadə etməklə nəqliyyata nəzarət.

Zəruri keyfiyyətləri:

• Strateji düşünmə;
• Müxtəlif nəqliyyat növləri haqqında məlumatlı olmaq;
• Danışıqlar apara bilmə bacarığı;
• Stresli vəziyyətlərin öhdəsindən gələ bilmə bacarığı. 

Logist olmaq üçün tələblər:

Ali təhsilin olması

Qrup: I

Təhsil istiqamətləri:

Logistika və nəqliyyat texnologiyaları mühəndisliyi

Təhsil ala biləcəyiniz ali təhsil müəssisələri:

1. Azərbaycan Dövlət Neft və Sənaye Universiteti

2. Azərbaycan Texniki Universiteti

3. Azərbaycan Memarlıq və İnşaat Universiteti

4. Bakı Mühəndislik Universiteti

5. Milli Aviasiya Akademiyası 

6. Azərbaycan Texnologiya Universiteti (Gəncə)

7. Sumqayıt Dövlət Universiteti